UEFA thirri sot në mesditë një video-konferencë përmes internetit, me të gjitha federatat anëtare. Për shkak të situatës nga koronavirusi, është vendosur që të gjitha kampionatet përfshi edhe ato shqiptare, do të përfundojnë në datën 30 qershor.
VENDIMI I UEFA-s për kampionatet e pezulluara:
“Gjetja e një zgjidhjeje dhe adaptimi të mundshëm për kualifikueset e kompeticioneve të UEFA-s për klubet për sezonin 2020/21, pas përfundimit të ligave dhe sezonit Europian më 30 qershor të këtij viti”.
Ky vendim u mbështet edhe nga presidenti i FSHF-së, Armand Duka, i cili tha se mbetet me shpresë që kjo situatë të kalojë sa më shpejtë, dhe secili ti rikthehet jetës normale.
“Unë uroj që kjo situatë të kalojë sa më shpejt, dhe të kthehemi në jetën normale e të shijojmë futbollin. Situata duhet të ndiqet hap pas hapi, dhe të bëjmë më të mirën e mundshme. Mbështes plotësisht propozimet e sotme, dhe do të bëjmë maksimumin për t’i realizuar ato”, tha Duka.
Situata që ka krijuar koronavirusi, ka ndikuar në të gjithë botën dhe deri tani janë anuluar shumë aktivitete. Prej javësh në Europë janë anuluar ndeshjet, pasi nuk lejohet grumbullimi i shumë njerëzve.
