Kreu i Shtetit, Ilir Meta, ka nisur procedurat për përcaktimin e datës së zgjedhjeve të pjesshme, teksa 6 Bashki janë në pritje të kryetarit të ri të zgjedhur. Palët duhet të vendosin së bashku mbi datën e mbajtjes së këtyre zgjedhjeve. Pas konsultimeve me presidentin, kreu i grupit parlamentar të PS-së Taulant Balla, ka zbuluar se Ilir Meta ka caktuar 6 marsin si datën për mbajtjen e zgjedhjeve.
“Zgjedhjet duhet të ishin zhvilluar në secilën prej Bashkive brenda afatit 45 ditor. Për ne nuk ka asnjë datë, data është e përcaktuar nga ligji dhe Kushtetuta. Nga ana e Presidentit të Republikës jemi informuar me institucionet për zgjedhjet e pjesshme 6 mars, duke marrë në konsideratë këto afate.
Shkeljet Kushtetuese të konstatuara këto 2 vite nuk duhet të kishin ndodhur, dhe zgjedhjet të ishin mbajtur. Ne kemi qenë në anën e duhur të historisë, dhe të respektimit të Kushtetutës. Besoj se edhe Meta e ka kuptuar se deri tani ka shkelur Kushtetutën”, tha Balla.
Pak ditë pasi shprehu gadishmërinë e tij për shpalljen e zgjedhjeve të pjesshme lokale, presidenti i vendit Ilir Meta i ka drejtuar sot ftesë partive parlamentare për konsultim. Ftesa bëhet për të nisur konsultimet për të caktuar një datë për mbajtjen e zgjedhjeve të pjesshme vendore.
