30 zyrtarë të lartë të shtetit rezultojnë me dosje si bashkëpunëtorë të Sigurimit të Shtetit. Listës i shtohen dhe katër gjyqtarë dhe prokurorë. Pavarësisht publikimit të shifrave emrat mbeten anonim, ndërsa institucionet që kanë marrë dijeni kanë qëndruar në heshtje, duke mbajtur dosjet poshtë sirtarëve.
Kryetarja e Autoritetit të Dosjeve, Genta Sula, ka bërë të ditur se janë zbuluar 30 zyrtarë të lartë që rezultojnë bashkëpunëtorë të Sigurimit të Shtetit dhe 4 të tjerë mes prokurorëve dhe gjyqtarëve.
Pavarësisht kësaj, nuk ka asnjë reagim nga institucionet shtetërore.
Madje dhe emrat e tyre mbeten top sekret, të paktën zyrtarisht.
Duket se kjo është dhe goditja e parë e ligjit, i cili duket se nuk shërben për zbardhjen e së vërtetës.
Situata ka sjellë reagimin dhe të përfaqësuesve të ish-të dënuarve politikë.
Është një problem i madh hapja e dosjeve në Shqipëri, prandaj edhe i shtrëngojnë. Politika është pas saj, politika është problem dhe gjithë politika sidomos në nivele të larta, edhe ajo që ka qenë edhe sot, i kanë përdorur dosjet e Sigurimit të Shtetit për pushtet. Ndaj dhe ne këmbëngulim të hapen pa kushte.Nëse në parlamentin shqiptar ka 30 deputetë ish-bashkëpunëtorë të të Sigurimit apo punëtorë, Shërbimi Sekret ka në dorë vendimmarrjen. I thërret një nga një, i thotë ose do ju nxjerrim kë keni pushkatuar, spiunuar, kë keni vrarë. Demokracia është në trysni”, deklaron kryetari i Shoqatës Antikomuniste të të Përndjekurve Politikë, Nebil Çika.
Në prag të zgjedhjeve vendore, partitë do të duhet që të kërkojnë informacion pranë Autoritetit të Dosjeve të Sigurimit të Shtetit dhe mbi kandidatët e tyre.
