“Në këto zona parashikohet të nxirren 18 000 fuçi naftë e papërpunuar në ditë.” Kështu u shpreh Ministrja e Infrastrukturës dhe Energjisë Belinda Balluku, në një konferencë për mediat, në lidhje me zbulimin e rëndësishëm të naftës në qarkun e Beratit.
Zbulimi i naftës u bë përkatësisht në Bllokun 2 dhe 3 në zonën e Shpiragut, duke u bërë kështu edhe zbulimi i parë në 30 vitet e fundit, i një vendburimi të ri të naftës. Punimet po vazhdojnë intensivisht edhe në puset e tjera, për të verifikuar shtrirjen e plotë të rezervuarit të naftës.
Në bazë të vlerësimeve që do bëhen do përcaktohen edhe zonat e tjera potenciale për nxjerrjen e naftës. Deri më tani punimet për shpimin e pusit “Shpiragu 4”, i kanë kaluar mbi 6 mijë metra thellësi.
