Kryetari i PD-së Lulzim Basha i propozoi ditën e sotme Kryesisë nisjen e procesit të përzgjedhjes, konsultimit dhe seleksionimit të kandidaturave për zgjedhjet parlamentare dhe vendore.
Vlen të theksohet fakti se vendimi i Bashës është një risi për politikën, pasi për herë të parë kandidatët për deputetë dhe kryetarë bashkie do të kenë votën e anëtarësisë së Partisë Demokratike.
Kujtojmë se përfshirja e anëtarësisë në përzgjedhjen e kandidatëve politikë të PD është një detyrim që u përfshi në statutin e PD me kërkesë të kreut të opozitës, si konkretizim i premtimit të tij se ai nuk do të bënte më kurrë i vetëm listën e kandidatëve për deputetë apo për kryetarë bashkie.
PD po zbaton parimin “një anëtar, një votë” për përzgjedhjen e kandidatëve për deputetë.
Ky proces pritet të nisë nga 20 Qershori deri në 15 Shtator, duke e mbajtur të angazhuar në maksimum bazën e Partisë Demokratike, shkruan “BW”.
