Federata Shqiptare e Futbollit është përfshirë në një skandal të madh sa i përket licencimit të ekipeve që marrin pjesë në garat europiane. UEFA ka marrë një vendim pas abuzimit të bërë nga FSHF në lidhje me klubin e Tiranës, së cilës iu dha autorizimi edhe pse kishte një borxh të madh ndaj palëve të treta. Këto probleme nuk pranohen nga UEFA dhe nuk pranojnë në gjirin e saj abuzime të kësaj kategorie. Çuditërisht, vendimi i parë që mori ky Komision, i përbërë nga ekspertë brenda FSHF-së dhe jo persona jashtë saj, ishte ai të pranonte një dosje me mangësi të dukshme të Tiranës.
Për këtë problem UEFA mori një dënim për FSHF-në, e cila tashmë nuk ka të drejtë të licencojë klubet shqiptare. E gjitha kjo pas skandalit të licencimit të klubit të Tiranës në kupat evropiane, duke shkelur procedurat. Report Tv ka siguruar raportin e Komisionit të Kontrollit Financiar të UEFA-s rreth dënimit që iu dha Tiranës për t’iu hequr 215 mijë eurot që do të përfitonte për pjesëmarrjen vitin e kaluar në Europa League.
Në vendimin e argumentuar për këtë masë ndëshkimore, tregohet qartësisht se si FSHF fillimisht i kishte mohuar licencën bardhebluve më datë 4 maj 2017, por 9 ditë më vonë ia kishte dhënë atë, edhe pse institucioni i futbollit ishte i ndërgjegjshëm që Tirana kishte borxhe të shumta dhe ishte në vështirësi financiare, duke rënë ndesh me rregulloret ndërkombëtare. Raporti tregon se Tirana kishte 432 mijë euro borxhe ndaj palëve të treta.
UEFA kërkoi shpjegime nga FSHF se pse kishte pasur një ndryshim vendim të tillë. FSHF deklaroi se vendimi i Apelit ‘ishte i papritur për FSHF, për shkak të mangësive në aplikimin e klubit’”, shkruhet në dokumentin e UEFA-s rreth kësaj teme. Ajo që e bën edhe më të çuditshme të gjithë, është fakti se Komisioni i Apelit i Licencimit të Klubeve në FSHF nuk kishte ekzistuar asnjëherë më parë dhe u ‘inaugurua’ me vendimin e dhënë për Tiranën një vit më parë.
