Një ngjarje e rëndë u regjistrua mbrëmjen e djeshme në kryeqytet, teksa 40-vjeçari Hekuran Billa mbeti i vdekur pas një atentati.
Ndërkohë janë zbuluar detaje të tjera në lidhje me lëvizjet e tij, si hyri në Shqipëri dhe lëvizjet e tij të fundit brenda vendit.
New24 ka siguruar dëshminë e familjarëve të viktimës në polici, duke zbuluar se 40-vjeçari mbante edhe një emër të dytë. Ai njihej ndryshe si Herland Bilali.
Sipas dëshmisë së familjarëve, Hekurani nuk u ka shfaqur asnjë shqetësim, madje lëvizte me makinë normale, të pa blinduar.
“Hekurani nuk na ka shprehur asnjë shqetësim. Nuk kishte frikë. Lëvizte në çdo orë i pa shoqëruar dhe me makinë normale të pa blinduar.
Pak ditë ka që u kthye nga jashtë vendit. Ishte në Belgjikë, kaloi në Angli dhe tranzit në Malin e Zi erdhi në Tiranë”, thuhet në dëshminë e tyre.
Ndërkohë bëhet me dije se viktima kishte nisur edhe një biznes për dhënien me qira të makinave në Tiranë.
“Dje ishte në Durrës u mor me ca dokumente makinash. Mbrëmë ishim bashkë tek komuna”, thuhet më tej në dëshmi.
