Kristal Abazaj një ditë më parë ka bërë lëvizjen e madhe të tij në karrierë, pasi i është bashkuar ekipit belg të Anderlecht. Talenti i Luftëtarit që është në pronësi të Skënderbeut do të mbushë arkat e dy klubeve të Kategorisë Superiore, pasi shifra e tij e transferimit është një rekord për kampionatin shqiptar.
Ka qenë vetë klubi i Anderlehtit, që ka bërë publik lajmin në orët e pasdites së të hënës, ndërsa Skënderbeu dhe Luftëtari kanë mbajtur gjithçka të fshehtë. “Operacioni” është mbyllur me sukses pas negociatave me ditë të tëra në Bruksel, ku enkas janë marrë drejtori sportiv i korçarëve, Haris Fakiç, si dhe agjentët Shkumbin Qormemeti dhe Elton Marini.
Transferimi i Abazajt në Belgjikë, mendohet ti ketë kushtuar ekipit të Anderlecht rreth 1.2 milionë euro, të cilat do të ndahen mes dy klubeve. Plot 563 mijë euro do të shkojnë për llogari të Skënderbeut, ndërsa 187 mijë euro në arkën e Luftëtarit, që ka në pronësi 25 për qind të kartonit të Abazajt. Kontrata fillestare është nënshkruar për 750 mijë euro, por mësohet se nëse Anderleht fiton titullin kampion këtë sezon dhe Abazaj luan një numër të caktuar ndeshjesh në fazën e grupeve të Ligës së Kampioneve gjatë edicionit të ardhshëm, gjithçka kompletohet me 1.2 milionë euro.
Abazaj do të përfitojë 200 mijë euro neto në vit, me një kontratë që pritet të jetë progresive, në rast se lojtari përmbush pritshmëritë. Sulmuesi që u grumbullua së fundmi me Kombëtaren shqiptare luan vetëm sezonin e tij të dytë në Kategorinë Superiore dhe pas 29 javëve kampionat është aktualisht kryegolashënues i bluzinjve me 9 gola. Prej një viti, ai ka qenë pjesë e padiskutueshme e Kombëtares Shpresa, derisa bindi edhe trajnerin kuqezi, Kristian Panuçi.
Anderlehti është një nga ekipet që ka akademinë më të zhvilluar në Europë, nga ku kanë dalë disa nga lojtarët më të njohur. Shumë prej yjeve që bëjnë pjesë në kombëtaren belge, janë rritur pikërisht nga kjo akademi. Në këtë sezon, Anderlehti po lufton për të fituar titullin kampion në Belgjikë dhe për të siguruar një vend direkt në fazën e grupeve të Ligës së Kampioneve.
Kampionati belg është futur në fazën finale, ku skuadrat janë ndarë në dy grupe, ato që luftojnë për titull dhe ato që luftojnë për rënien. Anderlehti ndodhet në vendin e dytë, pas Klub Bryzhit, që ka 3 pikë më tepër se skuadra e re e Abazajt. Te Anderlehti ka bërë histori ish-kapiteni i Kombëtares, Besnik Hasi, qoftë si futbollist, por edhe si trajneri i belgëve.
