Banorët e Mamurrasit janë zgjuar të tmerruar nga breshëritë e automatikut rreth orës 04:30 të mëngjesit, ku edhe është ekzekutuar me armë 27-vjeçari Indrit Pepa. I riu është qëlluar me breshëri automatiku, sapo ka dalë nga banesa e tij.
Familja e viktimës ishte e ngujuar për gati 5 vite, për shkak të konflikteve të hershme të 27-vjeçarit me një shtetas.
Pak më herët, policia bëri me dije me anë të një deklarate zyrtare se ka arritur që të identifikojë autorin e dyshuar të krimit, shtetasin me inicialet A.M., 49-vjeç. Ky i fundit është shpallur në kërkim nga ana e policisë. Viktima mësohet se të shumtën e kohës ishte jashtë vendit, dhe se nuk njihej shumë nga banorët e zonës.
https://tiranatoday.com/kush-eshte-i-riu-qe-u-vra-me-kallashnikov-debati-qe-pati-dje-me-disa-persona-policia-identifikon-autorin/
Policia
“Sot, rreth orës 04:30, është marrë njoftim se në Mamurras, afër xhamisë së qytetit, është plagosur me armë zjarri shtetasi I.P. 27-vjeç, banues në Mamurras, i cili është transportuar për në Spitalin e Traumës në Tiranë, por rrugës ka ndërruar jetë.
Falë veprimeve të shpejta hetimore, u bë i mundur identifikimi i autorit të dyshuar, shtetasit A.M. 49-vjeç, banues në Mamurras, i cili u shpall në kërkim dhe po punohet për kapjen e tij.
Grupi hetimor në vendngjarje, nën drejtimin e Prokurorisë së Rrethit Gjyqësor Kurbin, vazhdojnë hetimet për zbardhjen e plotë të rrethanave të ngjarjes”.
