Kryeministri i Maqedonisë, Zoran Zaev prezantoi marrëveshjen ndërmjet Bullgarisë dhe Maqedonisë, marrëveshje të cilën e vlerësoi si një hap të madh në interes të dy popujve. Marrëveshja parasheh përmirësim të marrëdhënieve, lidhje më të ngushta dhe rritje të bashkëpunimit mes dy vendeve si dhe tejkalim të të gjitha mospajtimeve të deritanishme. Në pjesën e parë të marrëveshjes parashihet intensifikim i lëvizjes së lirë të njerëzve dhe mallrave, rritje të shkëmbimit tregtar dhe bashkëpunimit në shumë sfera të rëndësishme, si dhe lidhje hekurudhore dhe energjetike. Marrëveshja në pjesën tjetër parasheh që dy Qeveritë të mos ndërmarrin veprime ose mos të japin deklarata që nxisin provokime dhe situata konfliktuoze, si dhe të angazhohen që të mos lejojnë as institucionet dhe organet e tjera të bëjnë të njëjtën. Në të më tej thuhet që dy vendet nuk do të ndërhyjnë në interesat dhe çështjet e brendshme dhe nuk do të paraqesin pretendime territoriale ndaj njëra tjetrës.
Zaev: Marrëveshja është në pajtueshmëri me interesat nacionale. Marrëveshja është pasqyrim i frymës së re të politikanëve, të cilët ndërtojnë ura, dhe nuk shkatërrojnë. Si kryeministër dhe si Qeveri jemi të vendosur fortë që të udhëheqim politika të cilat zgjedhin dhe nuk krijojnë probleme. Marrëveshjen e harmonizuam për shkak se kemi fqinj me vullnet të mirë për të mbyllur çështje të cilat na marrin kohën dhe energjinë. Marrëveshja do të bëhet publike në ueb faqen e Qeverisë. Ju bind se ajo është bazë për fqinjësi të mirë dhe miqësi, për infrastrukturë rrugore dhe gasifikim, për avancimin e këmbimit tregtar, dhe shpresoj se do të jetë impuls i fuqishën për korridorin tetë. Marrëveshja do të nënshkruhet në gjuhën maqedonase në pajtueshmëri me Kushtetutën e Maqedonisë dhe në gjuhën bullgare, në pajtueshmëri me Kushtetitën e Bullgarisë, në të cilat nënshkrim do të vendosim unë dhe kryeministri bullgar.
Marrëveshja do të nënshkruhet më 1 gusht në ambientet e Qeverisë së Maqedonisë nga dy kryeministrat, Zoran Zaev dhe Bojko Borisov. Më pas e njëjta do të përcillet në Kuvend për ratifikim nga ana e deputetëve. Miratimi i marrëveshjes u bë në mbledhjen e mbrëmshme të Qeverisë, ku përveç kësaj, ekzekutivi solli edhe pika të tjera. Një ndër ta ishte rekomandimi për kthimin e tarifës së lirë të energjisë elektrike gjatë ditës. Me këtë vendim i rekomandohet trupit rregullator për energjetikë që në bashkëpunim me kompanitë energjetike dhe Qeverinë të përgatisin analizë për kthimin e tarifës së lirë. Qeveria ka konstatuar poashtu se nga 73 reformat për tremujorin e parë nga plani 3-6-9, deri më tani janë implementuar ose adresuar 23. Ministrat poashtu kanë vendosur që të mbështesin Komunën e Çairit për të vazhduar punimet në sheshin “Skenderbe”, ndërsa mjetet do të sigurohen në buxhetin e vitit të ardhshëm.
