Ashtu siç ishte parashikuar, Zaev dhe Haradinaj kanë diskutuar edhe për rastin “Kumanova” gjatë vizitës së kryeministrit të Maqedonisë në Prishtinë.
Pas takimit mes Haradinajt dhe Zaev, të dy kryeministrat kanë dalë në një konferencë për mediet, ku thanë se kanë rënë dakord për avancimin e bashkëpunimit ndërshtetëror.
Për sa i përket çështjes Kumanova, Zaev tha se kjo është një çështje shumë e ndjeshme, duke pranuar se duhet një hetim ndërkombëtar për të zbardhur të vërtetën.
“Është çështje shumë e ndjeshme, çështje që qytetarët meritojnë ta dinë të vërtetën”, tha Zaev, duke shtuar se janë pajtuar që të ketë një hetim ndërkombëtar lidhur me këtë.
Sipas kryeministrit maqedonas, kjo do të jetë në interes të bashkëpunimit reciprok dhe rasti i Kumanovës nuk duhet të jetë pengesë për raportet ndërshtetërore.
Nga ana e tij, kryeministri i Kosovës Ramush Haradinaj e konsideroi vizitën e Zaev mjaft të rëndësishme, pasi sipas tij “Kosova dhe Maqedonia janë shtete fqinjë dhe i bashkon e ardhmja dhe se janë pajtuar të marrin përsipër shumë obligime dhe shprehu besimin se do të arrijnë t’i finalizojnë edhe në takimin e përbashkëta të dy qeverive”. Këto sipas tij, do të jenë në interes të qytetarëve të dy vendeve.
Po ashtu, Haradinaj tha se në takim kanë folur rreth projekteve të përbashkëta, avancimin e komunikimit ndërshtetëror, autostradën që lidh Prishtinën me Shkupin, hapjen e kalimit të ri kufitar etj, ndërsa Zaev vuri theksin te rëndësia e avancimit të shkëmbimit tregtar.
“Ne jemi dy shtete që ndajmë aspiratat e përbashkëta për anëtarësim në NATO dhe BE”, tha Zaev, duke shtuar se duhet mbështetje e ndërsjellë pasi e ardhmja e rajonit është në BE dhe NATO.
