Kryeministrit i Maqedonisë, Zoran Zaev ka deklaruar se borxhi i shtetit ndaj ekonomisë nuk pritet të tejkalojë 700 milionë euro, ndërsa tha se deri më tani është arritur shifra prej 400 milionë eurosh.
“Analizat që janë në vijim tregojnë se deri më tani është arritur shifra prej 400 milionë eurosh dhe deri në përfundim të analizave nuk pritet të tejkalohen 700 milionë euro”, tha kryeministri Zaev.
Lidhur me shërbimet inspektuese, kryeministri nënvizoi se ato do të jenë në funksion të parandalimit, në vend që të ndëshkojnë, siç ka qenë praktikë deri më tani.
Më pas Zaev mori pjesë në mëngjesin tradicional afarist të organizuar nga Lidhja e Odave Ekonomike të Maqedonisë.
Në mëngjesin tradicional ishin të pranishëm mbi 200 biznesmenë dhe përfaqësues të ndërmarrjeve anëtare të Lidhjes së Odave Ekonomike të Maqedonisë, të cilëve iu bashkangjitën edhe ambasadorë që veprojnë në Maqedoni, si dhe ministra dikasterial të Qeverisë së Maqedonisë.
Zaev tha se Qeveria e Maqedonisë tashmë ka vendosur që kushtet për investitorët vendas të jenë të njëjta me kushtet e investitorëve të huaj:
“Ne morëm vendim dhe tashmë në draftin e buxhetit të ribalancuar kemi inkorporuar mjete të konsiderueshme financiare që në pjesën e tërheqjes së investimeve shteti i barazon kushtet e investitorëve të huaj me investitorët vendas. Kjo do të thotë se kjo qeveri vazhdon me politikat e mbështetjes për tërheqjen e investitorëve të huaj, por e vërteta është se kushtet do të vlejnë edhe për investitorët vendas”.
