Ambasadorja e SHBA, Yuri Kim, ka reaguar sërish pas shpalljes “non grata” të ish-kryeministrit Sali Berisha dhe familjes së tij. Yuri Kim i ka përcjellë indirekt një mesazh Berishës, se Shqipëria po ndryshon, dhe se askush nuk mund të jetë mbi ligjin. Ambasadorja amerikane në Tiranë, i mëshoi fort faktit se gjatë dy ditëve të fundit ka parë zhvillime domethënëse, duke iu referuar vendimit për shpalljen “non grata” të ish-kryeministri Sali Berisha dhe dënimit me burg të ish-kryeprokurorit Adriatik Llalla. Ajo e mbylli me një mesazh domethënës, se Shqipëria po ndryshon, dhe se shteti ligjor duhet të mbizotërojë.
“Mendoj si ambasadore e SHBA-së do të doja të shikoja më shumë mundësi, zhvillim ekonomik për vendin, sepse Shqipëria është vend i shkëlqyer. Kjo është diçka për të cilën duhet të punojmë së bashku. Unë kam pjesën time, ju keni rolin tuaj. Shumë prej kësaj lidhet me demokracinë dhe me shtetin ligjor. Keni parë zhvillime domethënëse dje dhe një ditë më parë, të cilat duhet të vazhdojnë. Këto janë zhvillime pozitive të cilat duhet të vazhdojnë.
Nuk kam asgjë për të shtuar përveç asaj që ka thënë sekretari Blinken. Mesazhi është ky, Shqipëria po ndryshon, Shqipëria është anëtare e NATO-s. Shqipëria do të jetë anëtare e BE-së. Shqipëria është një aleate dhe mike e SHBA-së. Duhet të jetë një vend i pasur. Për të arritur atje, askush nuk mund të jetë mbi ligjin. Ditët e pandëshkueshmërisë duhet të vijnë në një fund. Ky nuk është një projekt i SHBA-së, është projekt që së bashku mund ta bëjmë. Le të vazhdojmë të bëjmë progres”, tha ambasadorja.
Berisha i shpall ‘luftë’ SHBA-së, hedh në gjyq sekretarin Blinken
Departamenti Amerikan i Shtetit e shpalli ish-kryeministrin “non grata”, por ky i fundit doli dje në një deklaratë për shtyp duke u shprehur se ka pajtuar një avokat francez, për të paditur kreun e DASH. Ish-kryeministri Sali Berisha ka vendosur të sfidojë Sekretarin Amerikan të Shtetit, Antony Blinken, duke e paditur për shpifje ndaj tij. “Jam këtu për t’ju informuar për një vendim të pazakontë por të rëndësishëm. Dje Sekretari i Shtetit në mënyrën më shpifëse ka bërë vlerësime të gënjeshtërta për personalitetin tim. Dua të theksoj se që kur kam filluar jetën politike, që kur kam prekur rrogën e parë në borderotë e shtetit, dhe gjeri ditën e djeshme nuk ka njeri në Shqipëri apo në botë që mund të thotë që unë kam qenë i implikuar në një afere të zakonshme korruptive. Kam udhëzuar avokatin tim që të ngrejë ndaj z. Blinken padi direkte për shpifje publike”, tha Berisha.
Nis lufta ndaj korrupsionit të lartë shtetëror, Adriatik Llalla dënohet me 2 vite burg dhe i konfiskohen pronat
Një ditë më parë, ish-kryeprokurori Adriatik Llalla u dënua me dy vite burg nga Gjykata e Posaçme. Prej më shumë se dy vitesh beteje me prokurorinë dhe gjykatat, dje Llalla është dënuar nga Shkalla e Parë me 2 vite burg. SPAK kërkoi dënimin e tij me 2 vite burgim dhe përjashtimin për 5 vite nga postet publike. Kërkesa e tij u pranua nga trupa gjykuese, duke shënuar në këtë mënyrë rastin e parë të dënimit të një zyrtari nga organet e reja të drejtësisë. Vendimi nuk ka formë të prerë dhe pritet që Llalla ta ankimojë në Apel. Por nëse dhe aty merret i njëjti vendim, atëherë ish-kryeprokurori do të futet në qeli. Ndërkohë avokati i tij në seancë ka hedhur poshtë pretendimet e prokurorisë, duke kërkuar pafajësi.
