Ish-kryetari i Bashkisë së Kamzës, Xhelal Mziu, u paraqit sot në Prokurorinë e Posaçme kundër Korrupsionit dhe Krimit të Organizuar për t’u marrë në pyetje. Ish-kryebashkiaku i Kamzës është kallëzuar pranë strukturës anti-korrupsion nga pasuesi i tij, socialisti Rakip Suli. Ky i fundit e akuzon Mziun për “shpërdorim detyre” lidhur me strehimet në Kamzë.
Në kallëzimin e tij, Suli ka kallëzuar Mziun pasi dyshohet të ketë favorizuar subjekte private, që janë pajisur me leje zhvillimi dhe ndërtimi, duke mos i detyruar të kalojnë 3 përqind të sipërfaqes funksionale për banesa sociale në favor ta Bashkisë. Referuar ligjit të urbanistikës, parashikon që leja me sipërfaqe 2000 m2, 3% ti kalojë Bashkisë për banesa sociale.
Mziu është i treti i cili paraqitet vetë në SPAK këtë javë. Dy ditë më parë u paraqit drejtori i DPSHTRR-së, Blendi Gonxhe ndërsa pak ditë para tij kryebashkiaku i Vlorës, Dritan Leli.
