Policia ka bërë të mundur parandalimin e një ngjarje, e cila mund të kishte pasoja fatale për jetën. Në pranga ka rënë një 59-vjeçar, i cili ka tentuar të vrasë me armë zjarri nipin e tij 22-vjeçar, banues në Rrëshen. Gjithçka ka ndodhur pas një konflikti të çastit, për motive të dobëta.
“Ndërhyrja në kohë e policisë, parandalon përshkallëzimin e një konflikti me pasoja për jetën. Sekuestrohet një armë zjarri pushkë me një karikator me 10 fishekë, në pranga autori i dyshuar.
Nga forcat policore të Komisariatit të Policisë Mirditë, pas telefonatës tek Salla Operative se në Rrëshen kishte një konflikt me përdorim armë zjarri, falë një pune hetimore dhe operacionale të mirëfilltë, është bërë ndërhyrja në kohë rekord, duke parandaluar një ngjarje kriminale të mundshme, ku në bashkëpunim me Komisariatin e Policisë Kurbin, arrestuan në flagrancë shtetasin Preng Teska, 59-vjeç, banues në Kurbin.
Ky shtetas, pas një konflikti të çastit për motive të dobëta, ka tentuar të vrasë me armë zjarri pushkë nipin e tij, shtetasin A.T. 22-vjeç, banues në Rrëshen”, bën me dije policia.
Referuar këtij rasti, nga ana e policisë është sekuestruar arma e zjarrit pushkë, me një karikator me 10 fishekë.
