Ministri i Brendshëm Fatmir Xhafaj tha se do të arrestohen shumë shpejt grupet kriminale në qarkun e Durrësit. Xhafaj zhvilloj sonte një vizitë blic në Portin e Durrësit. Ministri u shoqërua nga drejtori i Policisë së Shtetit Ardi Veliu. Në një prononcim të shkurtër për gazetarët ministri Xhafaj dha mesazhin e intensifikimit dhe bashkëpunimit më të ngushtë midis policisë, prokurorisë dhe SHISH për arrestimin e grupeve kriminale që operojnë në Durrës.
Një vëmendje e veçantë-theksoi Xhafaj- po i kushtohet kufirit, për bllokimin e trafikut të lëndëve narkotike drejt Italisë. Ai tha se po punohet ngushtësisht midis prokurorisë dhe SHISH në këtë drejtim, pavarësisht se trafikantët po kërkojnë rrugë të reja për trafikun e drogës.
Xhafaj tha se nuk mund të tregojë numrin e grupeve kriminale që operojnë në Durrës , por rezultatin shumë shpejt. Ndërkohë, në lidhje me ankesat që kanë bizneset në Durrës me radhë të gjatë të kamionëve Xhafaj tha se bllokimi i lëndëve narkotike ka bërë që të ushtrohen kontrolle të imtësishme, ndaj kërkoi mirëkuptimin e qytetarëve.
