Ministrja e Mbrojtjes, Olta Xhaçka ka dalë para Komisionit të Sigurisë duke raportuar lidhur me grupin e negociatorëve me Greqinë. Ka qenë opozita që e ka kërkuar këtë komision sepse për ta është një shqetësim futja e Artur Meçollarit si pjesë e grupit negociataor.
Ministrja ka thënë se Forcat e Armatosura e kanë larguar padrejtësisht Meçollarin dhe se ndaj tij ka një sulm për ti bërë pis figurën. “Vendi ynë ka pak ekspertë dhe ai ka një eksperiencë të gjatë dhe akses në informacione sekrete”, ka thënë Xhaçka.
“Artur Meçollarin e kam takuar për herë të parë në jetën time në fund të nëntorit 2017. Meçollarin e takova në Kabul ku ishte ushtaraku më i lartë shqiptar në misionin e NATO-s. E pranova kërkesën e komisionit për të sqaruar disa fjali të hedhura qëllimisht lart e poshtë”.
“Në vitin 2012, Meçollari u largua nga detyra padrejtësisht, arsyet e vërtetë janë se nuk pranoi të firmoste për disa baza detare nga plani i përhapjes”.
Ajo ka thënë se Meçollari ka certifikatë sigurie nga NATO, të parën e ka marrë në 2011. Ministrja hodhi akuza ndaj ish-kryeministrit Berisha, ku sipas saj, Meçollari nuk pranoi t’ju jepte bazat detare miqve të Berishës.
