Presidenti i Serbisë mund të themi se ka sulmuar keq politikanët shqiptarë, pasi sipas tij ata nuk duan të flasin për çështje serioze dhe thelbësore të cilat do të çonin në arritjen e një marrëveshje mes Kosovës dhe Serbisë.
Aleksandër Vuçiç të mërkurën është shprehur se përfaqësuesit e Prishtinës nuk duan të diskutojnë për çështje me rëndësi thelbësore.
“Shoh se zyrtarët shqiptarë nga Kosova nuk duan të flasin as për Komunitetin e Komunave Serbe (ZSO), as për Veriun, as për Gazivodën. Ata nuk duket se duan të flasin për ndonjë gjë thelbësore,” tha Vuçiç, kur një gazetar i Tanjugut i kërkoi atij të komentonte mbi deklaratat e fundit të bëra nga Hashim Thaçi dhe Ramush Haradinaj, të cilët po flasin për “çështje që nuk do diskutohen” në bisedimet mes Kosovës dhe Serbisë.
“Serbia nuk ka kohë për të humbur dhe dëshiron të diskutojë të gjitha çështjet që janë të rëndësishme për serbët dhe shqiptarët,” tha Vuçiç.
Ai gjithashtu vuri në dukje se është koha që Beogradi dhe Prishtina të marrin përgjegjësinë:
“Është koha që ne të vendosim për fatin tonë, në vend se dikush tjetër nga jashtë ta bëjë këtë,” tha Vuçiç.
Sipas tij, “politikanët nuk zgjidhen për të mashtruar veten dhe votuesit”, por për “zgjidhjen e problemeve më të mëdha të qytetarëve”.
Vuçiç foli dy ditë përpara takimit të tij të ndërmjetësuar nga BE në Bruksel me Thaçin dhe ndërsa zyrtarët e Prishtinës po bëjnë të ditur se nuk do të diskutojnë mbi ndonjë çështje thelbësore për normalizimin e marrëdhënieve dhe arritjen e një marrëveshjeje historike midis serbëve dhe shqiptarëve.
Në vend të kësaj, ata duan të diskutojnë “modalitetet për arritjen e një marrëveshje përfundimtare, ligjërisht detyruese”, pa shpjeguar se çfarë do të thotë termi “modalitetet për arritjen”./TIRANA TODAY/
