Ministri në detyrë i Punëve të Jashtme, Gent Cakaj ka reaguar në lidhje me disa deklarata të zyrtarëve serbë. Këta të fundit thanë se Masakra e Reçakut në Kosovë ishte një fabrikim dhe gënjeshtër.
Përmes një postimi në Twitter, Cakaj e krahason presidentin serb me Paul Joseph Goebbels, ministër i propagandës së Gjermanisë naziste.
Ai kërkoi nga aktorët ndërkombëtarë që të dënojnë këto përbuzje që po iu bëhen viktimave të kësaj masakre, duke e cilësuar se kjo është skandaloze.
“Joseph Goebbels i propagandës së Millosheviç tani është shndërruar në kampion të mohimit, nënvlerësimit dhe trivializimit të krimeve të luftës. Skandaloze! Aktorët ndërkombëtarë duhet t’i dënojnë veprat e tilla përbuzëse dhe shtrembëruese të së vërtetës që i fyejnë viktimat dhe përpjekjet e pajtimit. Masakra e Reçakut nuk do të harrohet kurrë!”, shkruan ai.
