Presidenti i Serbisë, Aleksandër Vuçiç, bëri një deklaratë ditën e sotme, ku tha do të shpërblejë me 30 dollarë të gjithë personat të cilët janë vaksinuar, ose do të vaksinohen kundër koronavirusit brenda datës 31 maj.
Kjo skemë do të shërbejë si mënyrë për të rritur më tej imunizimin e popullatës, shkruajnë mediat e huaja.
Ndërsa të vaksinuarit do të jenë të privilegjuarit, qytetarët që nuk janë vaksinuar që infektojnë të tjerët, do të vuajnë pasojat edhe nëse janë nëpunës në shtet.
“Jam konsultuar edhe me kryeministren. Kemi menduar t’i shpërblejmë ata që tregohen të përgjegjshëm, që të arrijmë imunitetin kolektiv. Nëse dikush është infektuar për faj të dikujt tjetër, ka marrë dy dozat e vaksinës, dhe është pjesë e një institucioni shtetëror, ushtrisë apo diku tjetër, do të marrë kompensim për lejen për shkak të sëmundjes. Të tjerët, jo. Nuk duam të diskriminojmë, por mendoj se mosvaksinimi është papërgjegjshmëri, është egoizëm.”, u shpreh Vuçiç.
