Presidenti serb Aleksandar Vuçiç ka mbërritur mbrëmjen e djeshme rreth orës 21:00 në Tiranë për të marrë pjesë në samitin e Brdo Brijunit, ku është takuar dhe me shefen e politikës së jashtme në BE, Federica Mogherini.
Ndërkohë, mediat serbe shkruajnë se Vuçiç është përballur në Tiranë me një situatë tensionesh.
“Aleksandër Vuçiç arriti në Tiranë mes një atmosfere tensionesh të nxitur nga deklaratat e Presidentit të Kosovës, Hashim Thaçi se bashkë me Kryeministrin e Shqipërisë Edi Rama, që kanë diskutuar rreth nismës rajonale për bashkimin e faktorit shqiptar, hapjen e plotë të kufirit mes Shqipërisë dhe Kosovës bashkë me Luginën e Preshevës”,tha media serbe, Tanjug.
Gjithashtu, përmendin edhe postimin e Hashim Thaçit, pas takimit me kryeministrin e Shqipërisë, Edi Rama, ku presidenti i Kosovës foli për fshirjen e kufijve mes dy vendeve.
“Sapo zhvillova një takim me kryeministrin e Republikës së Shqipërisë, Edi Rama, ku mes tjerash biseduam për domosdoshmërinë e hapjes së plotë të kufirit Kosovë-Shqipëri dhe krijimin e një hapësire shqiptare pa kufi, nën ombrellën euroatlantike”, ka thënë Thaçi, citojnë mediat serbe.
Ndërkohë, Lëvizja Vetëvendosje protestoi pasditen e së mërkurës në Tiranë kundër vizitës së presidentit të Serbisë, Aleksandër Vuçiç dhe kreut të serbëve të Bosnjës, Millorad Dodik.
Protestuesit mbanin pankarta ku shkruhej se Vuçiç e Dodik duhet të shpallen persona non-grata.
