Presidenti i Serbisë, Aleksandër Vuçiç ka folur për dialogun me Kosovën, pas takimit me senatorin amerikan Ron Johnson.
Vuçiç mbajti një konferencë për shtyp pas takimit, ku tha se Serbia është e gatshme për një zgjidhje kompromisi me Kosovën, por për kompromis nevojiten dy palë.
Nga ana tjetër, senatori amerikan u ka bërë thirrje të gjithë popujve në rajon që të shohin nga e ardhmja dhe të përpiqen të falin gjërat e vështira të së kaluarës, të cilat nuk mund të harrohen, raporton FoNet.
Por Vuçiç theksoi se SHBA dhe Serbia kanë pikëpamje të ndryshme mbi marrëdhëniet mes Beogradit dhe Prishtinës, ndërsa senatori amerikan i ka thënë se “Serbia është e gatshme për një zgjidhje kompromisi, por për këtë nevojiten dy palë”, përcjell Telegrafi.
“Nuk ka kompromis nëse njëra palë është absolutisht e kënaqur, kurse tjetra nuk është. Ne jemi të hapur për bisedime, nuk ngutemi të dalim në opinion për atë që është e mundur dhe çfarë nuk është, ajo që është e lejuar dhe çfarë nuk është”, tha Vuçiç, duke shtuar se për popullin më e rëndësishmja është që të arrihet deri te një vendim, por që Serbia të mos poshtërohet.
Presidenti serb deklaroi se senatori amerikan i kishte siguruar që SHBA-të duan stabilitet të plotë në rajon, duke shtuar se ky është prioriteti i tyre:
“Johnson më siguroi se SHBA-ja dëshirojnë stabilitet të plotë, paqe absolute në rajon dhe se kjo është prioriteti i tyre, që për ne është një lajm i mirë dhe i rëndësishëm.
Kam dashur t’ia bëj me dije angazhimin tonë, qasjen e kujdesshme dhe fleksibile, dhe se respektojmë interesat kombëtare serbe, duke mos u përpjekur për të shkelur dinjitetin e popullit shqiptar apo t’i lëndojmë në çfarëdo mënyre”.
