Në kuadër të nismës së “Ballkanit të Hapur”, përpara hapjes së panairit të verës në Beograd, presidenti serb Aleksandar Vuçiç u shpreh se “Ballkani i Hapur” nuk i ka sjellë asgjë të keqe askujt, duke shtuar se kritikët e kësaj nisme janë duke gjetur ‘gjilpërën në kashtë’. Ai shtoi se Beogradi është shndërruar në kryeqytet të verës.
“Ftoj qytetarët e Beogradit dhe të Serbisë që të vijnë deri të dielën, e të provojnë shijen e verës. Beogradi është kryeqyteti i verës sot. Mund të shihni sa i rëndësishëm është “Ballkani i Hapur” si nismë.
Shpresoj që prodhues nga vende të tjera të bashkohen me ne. Ne po përpiqemi që të heqim barrierat që kanë ekzistuar në këtë rajon. Nesër do kemi ministrat e Jashtëm të Turqisë dhe atë të Hungarisë, kjo tregon interesin edhe të vendeve të tjera për nismën e “Ballkanit të Hapur”.
Vera bën njerëzit bashkë, hapa të mëtejshëm vijnë më pas. Shumë njerëz shpenzuan energji për të organizuar këtë event siç është. Dua të falënderoj në emrin tim, Edit, Dritanit, Dhimitrit dhe të Anës këta persona që ndihmuan për këtë panair. Kritikët e “Ballkanit të Hapur” po gjejnë gjilpërën në kashtë. “Ballkani i Hapur” sjell vetëm gjëra të mira e ne do të punojmë më me zell, që ta bëjmë rajonin më tërheqës për këdo”, deklaroi Vuçiç.
E ndërsa kryeministri Edi Rama e quajti nismën “Ballkani i Hapur” më shumë se një projekt ekonomik. Në fjalën e tij nga panairi i verës tha se nisma është një projekt për të jetuar në paqe.
