Gazetari Enton Abilekaj, deklaroi se ka qenë vetëm 5 metra larg tavolinës, ku ndodhej Kudret Saliaj, 41-vjeçari i cili u ekzekutua në ambientet e një lokali pranë Gjykatës së Tiranës, nga ish-vjehrri i tij, Mexhit Picari. Deklarata e Abilekajt u bë mbrëmjen e sotme në emisionin ”Open” në Top Channel.
Abilekaj u shpreh se në momentin që u dëgjuan krismat, mendoi se po ndodhte një vrasje në masë, për shkak të plumbave të shumtë që u përdorën.
Ai tha se plumbat kishin përfunduar deri në redaksinë e medias që drejton, por për fat të mirë, askush nuk u lëndua. Ndër të tjera, Abilekaj tregoi se viktima ishte i lyer në gjak, teksa shtoi se një zonjë që ndodhej aty humbi ndjenjat.
Enton Abilekaj: ”Kur dëgjuam krismat kthyem kokat dhe pamë që kishte nisur vrasja, prisnim të mbaronin po ajo vazhdoi sikur të ishte një vrasje në masë, zgjatën krismat sikur po u drejtohej gjithë klienteve, jo vetëm një personi, u larguam në panik. Ishin 8 krisma si fillim, pastaj dy të tjerat s’di nga ku. Kur u ktheva në bar pashë ça kish ndodh, pashë viktimën dhe avokati që nuk fliste, një zonjë që humbi ndjenjat për pak çaste, i çuam diçka me alkool që të qetësohej, ndërkohë që viktima ishte aty. Por nuk po kuptohej ç’po ndodhte, ca lidhje kishin të tre, deri sa erdhi policia. Avokati u plagos rastësisht, ai qëndroi pa lëvizur fliste në telefon dhe mbante plagën me dorë. Kush ishte afër rrezikonte se mund të ndodhte gjithçka, por shyqyr spati asgjë.
Kur erdhi policia si la më as gazetarët, më pas kur shkova në zyrë pashë se gazetarët ishin në panik, dhe një plumb kishte hyrë në zyrë, ato dy plumbat kishin përfunduar në zyrë, plumbi kishte bërë rikoshet dhe ka shpuar xhamin në zyrë. Nga ajo që mësova vetë autori kishte dalë në Unazë për të hedhur armën në Lanë, dhe aty kishte qëlluar prapë, gazetarët i gjeta në panik. Kjo ishte ajo që pashë dhe me shokoi, nuk mësohesh dot kurrë, fillon dyshon pastaj për cçdo gjë. Ne pamë ngjarjen kur nisën krismat se nuk po kuptohej.”
Si ndodhi vrasja
Ngjarja e rëndë ndodhi mesditën e datës 4 qershor, në një lokal pranë Gjykatës së Tiranës, ku Mexhit Picari, vrau në mes të lokalit bashkëshortin e vajzës në proces divorci, Kudret Saliaj 41 vjeç, pak minuta para seancës së 5-të. I plagosur mbeti dhe avokati i viktimës, Adriatik Cama.
Kudret Saliaj u qëllua me 8 plumba, nga vjehrri, ndërsa në trup e kanë kapur 5 plumba. Viktima në momentin që është vrarë nga ish-vjehrri, ndodhej pranë gjykatës duke konsumuar një kafe me avokatin e tij, në këtë proces divorci, Adriatik Camaj, i cili po ashtu ka mbetur i plagosur. Autori ka qenë bashkë me vajzën Dhurata Saliaj në të njëjtin lokal me viktimën, disa karrige me tej. Mexhit Picari i ka shkuar nga afër Kudret Saliaj dhe e ka qëlluar me pistoletë. Pasi ka kryer vrasjen, është larguar në këmbë mes pallatesh. Ai është arrestuar tek shtëpia e vajzës së tij në Yzberisht.
