Gjykata në Britani ka dënuar me 12 vite burgim emigrantin shqiptar Erion Hoxha, pasi goditi me thikë punonjësen e qendrës së punësimit “Canning Town Job Centre”.
Hoxha hyri me thikë në dorë brenda qendrës së punësimit dhe goditi punonjësen 20-vjeçare. Ndërsa, tentoi të qëllonte edhe punonjësin e policisë, por ky i fundit e goditi me një pistoletë elektrike “Taser”. Pak ditë më parë, autori kishte shkuar në këtë qendër punësimi dhe kërcënonte punonjësit.
35-vjeçari shqiptar banonte në Glenister Street, North WoolWich, për të cilin u mor vendimi që të kryejë 8 vite burg dhe 4 vite nën shërbim prove.
Hetuesi e cilësoi një ngjarje të tmerrshme për të gjithë të pranishmit që ndodheshin brenda qendrës në atë moment.
