Elton Sefa, i cili akuzohet për vrasjen e punëdhënësit të tij, John Woodward është ekstraduar ditën e sotme në Angli.
Gjykata e Durrësit vendosi pro ekstradimit të 23-vjeçarit, i shpallur në kërkim nga autoritetet britanike që prej vitit 2018.
Ndërkohë, familjarët e të riut, i kanë mohuar akuzat me arsyetimin se djali i tyre ka probleme të theksuara mendore dhe sipas tij nuk është përgjegjës për veprimet e tij.
Por, pavarësisht deklaratave të familjarëve dhe mbrojtjes së avokatit, Gjykata nuk pranoi kërkesën e mbrojtjes për ekzaminim ligjor dhe vendosi ekstradimin e tij në Angli.
Policia tha dje se autoritetet gjyqësore britanike kanë përcjellë kërkesën për lokalizimin dhe arrestimin e tij, në bazë të urdhër arrestit të datës 05.01.2018 të Gjykatës së Magjistratëve në Mbretërinë e Bashkuar.
Ky është rezultati i parë pas Marrëveshjes dypalëshe, ndërmjet Republikës së Shqipërisë dhe Mbretërisë së Bashkuar dhe Irlandës së Veriut, e në bazë të kësaj marrëveshje, 23-vjeçari Elton Sefa do të jetë shtetasi i parë shqiptar që arrestohet në vendin tonë me qëllim ekstradimi drejt Mbretërisë së Bashkuar.
