Përmasat e sulmeve ndaj fëmijëve në zonat e konfliktit nëpër botë arritën nivele “tronditëse” në vitin 2017. Në një raport të ri, UNICEF-i denoncon se ekziston një mospërfillje e përhapur dhe flagrante ndaj ligjeve ndërkombëtare që synojnë mbrojtjen e personave më të brishtë. Drejtori i UNICEF-it, Manuel Fontaine tha se fëmijët po shënjestroheshin në shtëpitë e tyre, shkolla e parqe lojrash. “Një brutalitet i tillë nuk mund të kthehet në normalitet”, ishin fjalët e tij.
Në raport, flitet për disa prej zonave të konfliktit ku fëmijët kanë vuajtur janë keqtrajtur më së shumti përgjatë viti që po lëmë pas. Mes vendeve ku jeta e fëmijëve ka pasur kërcënime serioze renditen;
Afrika Qendrore, ku fëmijët vriten, përdhunohen, rrëmbehen e rekrutohen nga grupet e armatosura;
Nigeria e Kameruni, ku militantët e Boko Haramit detyruan të paktën 135 fëmijë që të ndërmerrnin sulme kamikaze, gati 5 herë më shumë se në vitin 2016;
Mianmari, ku fëmijët Rohingia kanë vuajtur një dhunë të paprecedentë;
Sudani Jugor, Jemeni e gjithashtu Ukraina lindore, ku 220 mijë fëmijë po jetojnë nën kërcënimin konstant të minave dhe pajisjeve të pashpërthyera të luftërave.
Miliona fëmijë vuajnë nga kequshqyerja, sipas raportit, sëmundjet dhe traumat, pasi qasja ndaj ushqimit, ujit, shëndetësisë dhe higjienës pengohet nga luftimet. UNICEF-i i bën thirrje palëve të përfshira në konflikte që të respektojnë detyrimet mbi bazën e ligjit ndërkombëtar, duke i dhënë menjëherë fund sulmeve ndaj fëmijëve.
“Fëmijët janë në shënjestër dhe janë të ekspozuar ndaj sulmeve dhe dhunës brutale në shtëpi, shkolla dhe terrenet e lojërave”, tha Fontaine, drejtor i programeve emergjente të Unicef, shkriuan BBC.
“Meqë këto sulme vazhdojnë vit pas viti, ne nuk mund të qëndrojmë të mpirë. Një brutalitet i tillë nuk mund të jetë normal i ri”, përfundoi në fjalën e tij Fontaine.
Raporti thotë se në disa vende, fëmijët jënë rrëmbyer nga grupet ekstremiste, me qëllim abuzimin dhe më pas dërgimin e tyre te forcat e sigurisë.
“Unicef u bën thirrje të gjitha palëve të konfliktit t’i përmbahen detyrimeve të tyre sipas ligjit ndërkombëtar për t’i dhënë fund menjëherë shkeljeve ndaj fëmijëve dhe synimin e infrastrukturës civile, duke përfshirë shkollat dhe spitalet”, shton raportet.
“Unicef gjithashtu u bën thirrje shteteve me ndikim mbi palët në konflikt që ta përdorin atë ndikim për të mbrojtur fëmijët”. TIRANA TODAY
