Gazetari investigativ Artan Hoxha ka dhënë një deklaratë të fortë mbi ngjarjen e rëndë në Malësinë e Madhe, ku humbën jetën dy të rinj, Vilson Çutaj dhe Klement Pepaj. Ai nxjerr prapaskena të forta se çfarë është manipuluar me këtë ngjarje të rëndë, dhe pse policia veproi 5 ditë me vonesë ndonëse kishte sinjale të qarta.
Sipas Hoxhës, policia u vonua qëllimisht 5 ditë për të gjetur kufomat e 2 viktimave, në mënyrë që të asgjësoheshin parcelat me kanabis.
Ai thotë me ironi se teksa policia shkoi në skenën e krimit në një zonë të pyllëzuar, para se të gjente viktimat, ka parë nga larg tymin e zjarrit që po digjte parcelën me kanabis.
Gazetari kërkon të dije se si është e mundur që të kishte zjarr në një zonë ku prej tre ditësh binte shi. Periudha 5 ditore, sipas Artan Hoxhës, i ka shërbyer uniformave blu për të asgjesuar parcelat me kanabis, dhe për të fshirë gjurmët nga vendi i krimit.
https://www.facebook.com/artan.hoxha.900/posts/3320012018036443
3 kushërinjtë Vilson Çutaj 37 vjeç, Klement Pepaj 21 vjeç dhe Daniel Pepaj 25 vjeç, rezultonin të zhdukur që prej mesditës së 3 tetorit në fshatin Bajzë të Malësisë së Madhe.
Ngjarja e rëndë dyshohet se ka lidhje me pazaret e drogës. Nga të dhënat dyshohet se Vilson Çutaj dhe Klement Pepaj akuzonin kushëririn e tyre Daniel Pepaj se u kishte vjedhur 50 kg kanabis.
