Gjyqi për vrasjen e Marvi Mihalit ka degjeneruar në sharje e fyerje. Pas seancës së gjyqit, familjarët e të dyja palëve kanë reaguar për mediat.
Tom Bitraj, babai i një prej të akuzuarve për vrasjen e Mihalit për një karikues celulari ka shpërthyer duke akuzuar babanë e të ndjerit, Marvo Mihali, Pavlo Mihali të cilin e quan një gënjeshtar.
Bitraj tha se prindërit e Marvit kishin vendosur dëmshpërblim 500 mijë lekë çdo muaj për 40 vjet, duke pretenduar se i biri mund të ishte bërë gjyqtar.
“Vunë 500 mijë lekë, çdo muaj për 40 vjet. Djali mund të ishte bërë gjyqtar thanë. 340 mln lekë nxorrën në fund dëmshpërblim. Mos bëjnë zhurmë e mos gënjejnë atje në gjykatë.
S’kam folur, kam vlerësuar dhimbjen e atij. Kurrë s’kam dash me e bë këtë, po rrenën nuk e duroj dot. Ai më shau, unë e shava. Ai është 60 vjeç burrë, edhe unë 60 vjeç, ama duket më i vjetër se unë. Ai ka vdek prej thikës jo prej grushteve. Ai ka dalë shumë në media, s’kam dash me iu kthy ballë-përballë për me i respektu dhimbjen. Ata u zunë si kalamaj. Ky bën si kalama, më vërsulet mu”, tha Tom Bitraj para gazetarëve.
Djali i vetëm i familjes Mihali u godit me thikë në korrikun e vitit 2017 dhe ndërroi jetë për shkak të plagëve të marra pas një konflikti për një karikues telefoni mes një mikut të tij dhe Dejvi Bitrajt.
Prokuroria ka kërkuar 24 vite burg për Dejvi Bitrajn, 20 vite burg për Marsel Allën, 25 vite burg për Kridens Allën, 18 vite burg për Eugen Bitrajn.
