Prindërit e Marvi Mihalit kanë folur sot për mediat, pas zhvillimit të seancës gjyqësore, ndërsa kërkojnë drejtësi. Babai i Marvit tha se nëse nuk vihet drejtësi, do të funksionojë Kanuni dhe Kurani. Nga ana tjetër, e ëma deklaroi se nuk pranojnë dëmshpërblim dhe shprehu pikëllimin për humbjen e djalit. Po kështu ata shtuan se vrasja ishte me paramendim në bashkëpunim, dhe se drejtësinë do e vendosin vetë.
“Në mënyrën më absolute, ne nuk kemi kërkuar asnjë lloj dëmshpërblimi. Nuk mundet kurrë të laj gjakun e djalit tim me lek. Këto janë shpifjet e asaj familje kriminale.
Familje që ka pjellë kriminelë. Dënoj gjestin e tij dhe hedh me neveri të gjitha deklaratat që ka thënë ky njeri. Sepse bashkëshortja ime duke u përgjigjur në sallën e gjyqit për problematikat që kishte, ai çohet dhe e ndalon duke shkelur etikën e një gjyqi që zhvillohet normalisht.
Katër kriminelë ma vranë, e deri te avokatët e deri te Prokurori Artan Lulaj. Ky degracion duhet të marrë fund njëherë e përgjithmonë. Në qoftë se nuk bëhet drejtësi, do të funksionojë ligji i Kuranit dhe Kanunit.
Që javës tjetër që u dha pretenca, dhe që kur ndodhi ngjarja, ai e ka quajtur gjest kalamajsh. Vrasja ishte me paramendim në bashkëpunim. Ata jo vetëm që e vranë dhe nuk e pranuan krimin. Ata kanë luajtur ping-pong. Njëherë e vrau njëri, njëherë tjetri. Drejtësinë do e vendosim vetë.
Ata vinin në gjyq duke na pështyrë te këmbët. Ata bëjnë pushime nëpër ishujt e Greqisë, ndërsa djali im u fut në dhe. E provofshin dhimbjen e madhe që po provoj unë çdo ditë. Nuk pranojmë gjyq dëmshpërblimi”, u shprehën prindërit e Marvi Mihalit, në një deklaratë për mediat.
