Gjykata e Krimeve të rënda ka dhënë masën e sigurisë arrest me burg për katër persona të cilët akuzohen për vrasjen e Devi Kasmit, pak ditë më parë në rrugën “Kongresi I Manastirit”.
Greku Efthymiou Efhtymiuos ka vendosur 10 mijë euro si garanci, por trupi gjykues vendosi të mos e pranojë. Gjithashtu masa e sigurisë “Arrest me burg” është dhënë edhe për Elton Halipaj dhe Elton Hoxhallari dhe Malvin Dinellari.
Këta persona akuzohen për atentatin mafioz ku mbeti i vrarë Devi Kasmi. Në seancën e sotme gjyqësore kundër grupit të strukturuar kriminal të arrestuar për organizimin dhe vrasjen e Devi Kasmit mbrëmjen e 29 dhjetorit, janë dëgjuar dëshmi me vlerë, nga të cilat kanë dalë në dritë detaje të reja.
Mes dëshmive është regjistruar edhe ajo e babait të Elton Halipajt, personi që akuzohet se siguroi mjetet për vrasjen e Devi Kasmit. Hyda Halipaj, nënkryetari i shoqatës së pensionistëve, tha se pak kohë më parë i kishte siguruar të birit një punë si kopshtar pranë njërës prej minibashkive në kryeqytet por se e kishte refuzuar-raporton BW.
“Më tha që nuk dua ta bëj atë punë, se kam gjetur një tjetër”,- tregoi i moshuari.
Ndërkohë në lidhje me këtë ngjarje është shpallur në kërkim (Altin) Aurel Hoxhallari, 41 vjeç, lindur e banues Tiranë, i cili është një person i skeduar dhe me precedent penal në të kaluarën.
