Dalin detaje të reja lidhur me të arrestuarit, të dyshuar si bashkëpunëtorë në vrasjen e Jurgen Kurtit më 18 mars, në rrugën “Zef Jubani”, në Tiranë. Përgjimet e të rinjve tregojnë se ata kanë folur për një shumë parash që do të merrnin për “punën e kryer”.
“Ke folur për ato lekët?”, “Kur do i marrim ato lekët?”, janë këto disa prej bisedave të përgjuara mes tyre, raporton BalkanWeb.
Atentatorët kanë lëvizur me një automjet tip Benz, ngjyrë gri, i cili është në pronësi të personit të shpallur në kërkim dhe rezulton me dokumentacion të rregullt të regjistruar në Fier.
Për të shkuar tek të arrestuarit policia ka grumbulluar mbi 50 kamera sigurie nga liqeni deri tek ‘Pallati me Shigjeta’, nga ku ka zbuluar 4 të rinjtë dhe lidhjen mes tyre. Në drejtim te mjetit ka qenë i shpalluri në kërkim ndërsa pranë banesës së Kurtit dhe personi që e ndiqte në këmbë ka qenë 21-vjeçari, Elsi Leventi. Edhe momentin e vrasjes, 21-vjeçari ka qenë i pranishëm në zonë dhe dyshohet se ai ka njoftuar ekzekutorët për mbërritjen e Kurtit pranë pallatit.
Nga këqyrja e kamerave të sigurisë në zonë policia ka ndjekur lëvizjet e 21-vjeçarit dhe të makinës dhe është parë se pas atentatit ata janë takuar. Pas identifikimit të personave ata janë vënë në përgjim dhe janë arrestuar.
Arma, makina dhe sendet e tjera të sekuestruara nga policia janë gjetur në banesën e Alesio Berberit. Të 3 të arrestuarit kanë mbajtur qëndrim mohues para policisë dhe nuk kanë pranuar përfshirjen në këtë ngjarje. Ata rezultojnë të jenë me arsim 8 dhe 9-vjeçar dhe të papunë, çka rriten edhe më tej dyshimet për veprimtarinë e tyre. Policia ende nuk ka një motiv për ngjarjen, i cili ka çuar në vrasjen e Jurgen Kurtit i njohur ndryshe si “Menaxheri i VIP-ve”.
