Duket se historia e dhimbshme e Eglantina Bucit, do të zgjasë për një kohë të gjatë. Është xhaxhai i së ndjerës, Bashkim Buci, i cili ka depozituar në Policinë e Tiranës një kërkesë për të marrë eshtrat e mbesës së tij dhe për t’i bërë varrimin.
Eshtrat nuk i janë dorëzuar familjes, pasi hetimet vijojnë ende. Por ai është paraqitur në polici, ku dhe ka shprehur interesimin e tij, raporton “Balkanweb”. Ndërkohë që pritet një urdhër nga prokurori i çështjes.
23-vjeçarja u vra 8 vite më parë, dhe eshtrat e saj u gjetën të groposura në Malin me Gropa, krim për të cilin akuzohen babai i saj dhe vëllai, Shkëlzen Buci. Ky i fundit mohoi që të jetë autor i krimit, ndërsa theksoi se nuk kishte ngritur kurrë dorë ndaj së motrës. Madje ai tha se nuk dinte të qëllonte me armë.
“Kam shpirtin e djegur dhe të përvëluar. Mbas shumë vuajtjesh, motrën e çuan e bënë copa në Malin me Gropa dhe na nxorën familje horror”. Kështu është shprehur Shkëlzen Buci, i dyshuari kryesor për vrasjen e motrës së tij, Eglantina Buci. Buçi tha për emisionin “Me zemër të hapur” se dëshmitari duhet të tregojë të vërtetën.
