Serge Svetnoy, përgjegjësi për ndriçimin në sheshin e xhirimit ku u vra kineastja Halina Hutchins nga aktori Alec Baldwin, ka publikuar foton e fundit të saj para se të qëllohej me armë.
Ai po qëndronte pranë kineastes, kur ajo u qëllua gjatë xhirimeve të filmit. Përgjegjësi për ndriçimin e filmit “Rust”, ka shpërndarë foton më të fundit të Halina Hutchins pak para se të vritej nga aktori Alec Baldwin.
Serge Svetnoy ishte duke qëndruar pranë Halina Hutchins, kur ajo mori plumbin gjatë xhirimeve të filmit brenda kishës. Fotografia është bërë në të njëjtën ditë të incidentit, dhe tregon Hutchins (në një rreth të kuq) duke mbajtur një aparat fotografik, ndërsa Alec Baldwin qëndron i rrethuar nga anëtarët e ekuipazhit në mjedisin e kishës, me ndriçim të dobët.
Anëtari me përvojë i ekuipazhit përshkruan momentin e tmerrshëm kur mbajti Halinën në krahë, teksa 42-vjeçares po i rridhte gjak.
Teksa ka shpërndarë një postim emocionues në shenjë nderimi për të, Serge Svetnoy foli për “neglizhencë dhe jo profesionalizëm”, duke fajësuar përgjegjësit se nuk e kryejnë punën e tyre siç duhet, duke punësuar një armëpunues pa përvojë.
“E mbajta në krahë ndërsa po vdiste. Gjaku i saj ishte në duart e mia. Nuk i uroj askujt të kalojë atë që kam kaluar unë, atë që kaluan burri i saj Matt Hutchins, djali i saj, por edhe aktori Alec Baldwin, të cilit i dhanë një armë në xhirime. Ai duhet të jetojë me mendimin se i ka marrë jetën njeriut, për shkak të njerëzve jo profesionistë”.
“Personi që duhet ta kontrollonte këtë armë para se ta sillte në set, nuk e bëri. DHE REZULTATI ËSHTË VDEKJA E NJERIUT!”, ka shkruar ai në një postim.
Burimi i lajmit: protothema. Përshtatur nga Tirana Today
