Ambasada gjermane në Tiranë ka reaguar në lidhje me votimin e Kuvendit për 2 anëtarët e Gjykatës Kushtetuese.
Përmes një postimi në Facebook, ambasadori Peter Zingraf shkruan se në rrugën drejt një Gjykate Kushtetuese funksionale, është e rëndësishme që të gjithë aktorët të marrin përgjegjësitë e tyre.
Ndërkohë, Zingraf rikujtoi edhe një herë kushtin e Bundestagut Gjerman për funksionimin e Gjykatës Kushtetuese.
“Në rrugën drejt një Gjykate Kushtetuese funksionale është e rëndësishme, që të gjithë aktorët të marrin përgjegjësitë e tyre në emërimin e gjykatësve kushtetues dhe të mos humbin fokusin. Ne përshëndesim vendimin e sotëm të parlamentit shqiptar. Bundestag-u Gjerman e ka theksuar në vendimin e tij të datës 26 shtator 2019 se sa e rëndësishme është rivendosja në funksionalitet e Gjykatës Kushtetuese edhe për procesin e përafrimit të Shqipërisë me BE-në. Gjermania do të vazhdojë ta mbështesë Shqipërinë në përforcimin e drejtësisë dhe shtetit ligjor”, shkruhet në postim.
