Presidentja e Komisionit Europian, Ursula von Der Leyen deklaroi ditën e sotme se Bashkimi Europian nuk do të pranojë zgjidhjen me dy shtete në Qipro. Von der Leyen, e cila ndodhet për një vizitë në Qipro, tha se Bashkimi Europian ka një vendim të përbashkët në lidhje me këtë çështje, shkruan Euronews.
“Unë dua të përsëris se ne kurrë, kurrë nuk do të pranojmë një zgjidhje me dy shtete. Ne jemi të vendosur në këtë dhe shumë të bashkuar,” tha Presidentja Von der Leyen në një konferencë për shtyp.
Qiproja është ndarë që nga viti 1974, kur Turqia pushtoi një pjesë të vendit. Veriu i kontrolluar nga Turqia shpalli pavarësinë më 1983, por njihet vetëm nga Ankaraja. Qipro u bë anëtare e BE-së më 2004.
Prej 6 dekadash, Kombet e Bashkuara kanë vendosur paqëruajtës në Qipro dhe që nga ajo kohë po përpiqen të ndërmjetësojë një marrëveshje për ishullin.
Qipriotët grekë thonë se pengesë për mosarritjen e marrëveshjes është këmbëngulja nga pala turke që Qipro të ndahet në dy shtete, ndërsa Nikozia mbështet ribashkimin bazuar në një model federal.
