Një tjetër laborator droge është zbuluar sot në Vlorë. Pas një kontrolli të ushtruar në garazhin e një pallati 5-katësh të pabanuar në lagjen “1 Maji”, pranë zonës së quajtur “Plazhi i Vjetër”, policia ka zbuluar se ambienti ishte i pajisur me llamba dhe sistem elektrik të posaçëm dhe të përshtatur me kushtet bazë për kultivimin e bimëve narkotike.
Gjithashtu, shërbimet kanë gjetur kova të mbushura me pleh si dhe sasi të vogla mbetjesh me lëndë narkotike të dyshuar si Cannabis Sattiva.
Policia ka sekuestruar një mjet lundrues Gomone me gjatësi 8.2 m, me dy motorë të markës “Mercury” me fuqi 250 CC secili, si dhe një mjet tip Fuoristradë, i cili u gjet i lidhur me gomonen.
Në afërsi të mjeteve, policia ka sekuestruar edhe 30 bidona plastikë të mbushur me karburant “benzinë”, në total rreth 800 litra.
Lidhur me këtë ngjarje, policia ka shoqëruar 5 persona, si dhe po punon për kapjen dhe arrestimin e autorëve si dhe të personave të tjerë të implikuar në këtë aktivitet kriminal, duke përfshirë firmën ndërtuese apo punonjës të OSHEE-së, përgjegjës për furnizimin e këtij objekti me energji elektrike.
