Vllaznia B ka siguruar mbijetesën në Kategorinë e Parë në ndeshjen e Play Out-it të luajtur në ‘Niko Dovana’, pasi ka mposhtur 4-3 me penallti Orikumin. Një ndeshje mjaft emocionuese për shkodranët të cilët janë i vetmi ekip B i skuadrave të Superiores që luan në këtë kategori.
90’ minutat e kohës së rregullt u mbyllën me rezultatin e barabartë 2-2, falë golave të Dycës dhe Pusit për shkodranët dhe Hoxhës e Dhramit në minutën e 95’ për skuadrën e Orikumit. Në 30 minutat shtesë Vllaznia B pati edhe një mundësi të mirë për të fituar pa pasur nevojën e 11-metërshave, por Gurishta humbi një penallti në favor të shkodranëve.
Ndërkohë që Vllaznia B siguroi me vuajtje mbijetesën, një tjetër Vllaznia, ajo e madhja e futbollit shqiptar, do të duhet të lutet e të shpresojë për të bërë të njëjtën gjë në Superiore. Nëse skuadra e parë nuk ia del të mbijetojë mes më të mirave të futbollit shqiptar, atëherë edhe Vllaznia B do të shkojë në Kategorinë e dytë, pasi rregullorja nuk e lejon që dy skuadra të luajnë në të njëjtën Kategori.
