Vjen kandidatura e parë për zëvendësimin e Llallës. Është drejtuesi i Prokurorisë së Apelit në Durrës, Ferdinand Elezi ai që po zhvillon një takim me Adriatik Llallën në zyrën e këtij të fundit, me fokus zgjedhjen e Prokurorit të Përgjithshëm të përkohshëm.
Kuvendi ka hapur ditën e sotme garën për zgjedhjen e kryeprokurorit të përkohshëm. Secili kandidat ka katër ditë kohë për të dorëzuar dosjen e tij për postin e Prokurorit të Përgjithshëm.
Kujtojmë që zgjedhja e kryeprokurorit është tema më e “nxehtë” e momentit, teksa ka shkaktuar një debat mes mazhorancës dhe opozitës, ku kjo e para mbështet zgjedhjen e një prokurori të përgjithshëm të përkohshëm me shumicë të thjeshtë, pra 71 vota, ndërsa PD kërkon që:
· Të merret vlerësimi/opinioni i Këshillit të Legjislacionit në Kuvendin e Shqipërisë mbi zgjidhjen e boshllëkut/ngërçit kushtetues apo ligjor.
· Deri në plotësimin e boshllëkut kushtetues dhe ligjor apo deri në krijimin e KLP, është e pamundur që të procedohet me zgjedhjen e një Prokurori të Përgjithshëm, qoftë ky edhe i përkohshëm.
· Mandati i Prokurorit të Përgjithshëm deklarohet i përfunduar vetëm nga KLP dhe neni 109 është i pazbatueshëm. Për këtë shkak PD kërkon nga mazhoranca ndërprerjen menjëherë të procedurës që ka nisur në kundërshtim me Kushtetutën dhe ligjin.
PD thotë se “Çdo veprim i kundërt nga mazhoranca do të ishte provë e qartë e vullnetit të saj të hershëm për kapjen politike të organeve të drejtësisë, përfshirë edhe prokurorinë”.
Ambasadori amerikan në Tiranë, Donald Lu dhe delegacioni i Bashkimi Evropian në Shqipëri, ashtu si PS kërkojnë Prokuror të Përkohshëm.
Kështu, SHBA dhe BE duket se i kanë dhënë një “ndihmë” të madhe mazhorancës për të përfunduar procesin e largimit të Adriatik Llallës si kryeprokuror, me përfundimin e mandatit të tij.
“Ligji për organizimin dhe funksionimin e prokurorisë parashikon dispozita të qarta transitore – siç konfirmohet nga EURALIUS dhe OPDAT në opinionin e tyre në Kuvend. Ne e ftojmë Kuvendin të procedojë në respekt të plotë të ligjit”, thuhet ndër të tjera në reagimin e BE.
