Ish-deputeti Gjetan Gjetani, në ABC-ja e mëngjesit foli për ndarjen nga jeta të vjehrrit të tij Hasan Mira, 65-vjeç, i cili ishte një nga personat që i dha fund jetës në spitalin e Sanatoriumit. Ai e cilësoi si një rrufe në qiell të hapur, ndërsa i ndjeri nuk e kishte kuptuar se ishte infektuar.
Gjetani tregoi se vjehrri i tij gëzonte shëndet të mirë, ndërsa kishte mbi dy javë i infektuar. Sipas mjekëve, koronavirusi është konstatuar shumë vonë. Ndërsa lavdëroi punën e mjekëve, ai parashtroi disa problematika lidhur me atë se çfarë duhet bërë për pacientët. Gjetani tha se në Sanatorium nuk ka një psikiatër, dhe se njerëzit me probleme të tilla nuk mund të shtrohen në katin e katërt.
“Ishte një rrufe në qiell të hapur. Gëzonte një shëndet shumë të mirë. Nga sa më kanë thënë mjekët, kishte mbi dy javë i infektuar. Ka pasur një fizik shumë të mirë, dhe nuk e ka kuptuar sëmundjen.
Sipas mjekëve, është konstatuar shumë vonë. Për shërbimin e mjekëve nuk kam asnjë ankesë, por të themi realitetin dhe të jemi të sinqertë. Nga ana e qeverisë ka shumë mangësi. Në Sanatorium nuk ka një psikiatër, njerëzit me probleme të tilla nuk mund të shtrohen në katin e katërt.
Duhet të merren masa që persona me probleme të tilla të shtrohen në katin e parë. Ishte në një gjendje të mirë shëndetësore, COVID-19 nuk e ka kuptuar fare, kishte mbi dy javë. Doktorët e Burrelit nuk e kanë zbuluar këtë sëmundje. Por kur ka bërë një vizitë në Sanatorium, është konstatuar me koronavirus”, tha ai.
Gjetan Gjetani, duke cituar mjekët, u shpreh se COVID-19 godet organizmin e njeriut në pikën më të dobët. Në rastin e vjehrrit, i ka goditur sistemin nervor.
“Sipas mjekëve, COVID-19 godet organizmin e njeriut në pikën më të dobët. Ka persona që i ka goditur në mushkëri. Në rastin konkret, i ka goditur sistemin nervor. Kur unë e kam takuar, ka qenë shumë mirë, nuk arrita ta besoj. Në spital kam hyrë, e kam parë me sytë e mi, kam parë edhe angazhimin e përkushtuar të mjekëve. Janë vërtet heronj, pasi përballen edhe me problemet e qytetarëve.
Kishte shfaqur shenja agresiviteti më parë?
“Jo, vetëm të mërkurën në mëngjes i ka shfaqur këto probleme”.
