“Gratë më besojnë mua, sepse gratë e dinë se çfarë është puna”!. Kështu deklaroi Kryeministri Edi Rama teksa u ndal sot në Kamëz në dy familje dibrane dhe kuksiane që kanë përfituar nga skema e rindërtimit të banesave për shkak të dëmeve nga tërmeti. Rama deklaroi gjatë vizitës në njërën prej familjeve se PS e ka fituar mandatin e tretë dhe tashmë do i shkojë punëve deri në fund ndërsa shtoi se edhe në Kamëz do mbarohen të gjitha punët pasi për të nuk ka rëndësi për kë votojnë. “Erdha se nuk e besonit. Gratë më besojnë mua. Nuk më besojnë burrat. E di pse më besojnë gratë se e dinë se çfarë është puna. Nuk bëhen gjërat kollaj. Kurse burrat i dinë kollaj gjërat. Detyrën kemi bërë ne dhe do ta bëjnë deri në fund. Ne e fituam mandatin e tretë. Këtu në Kamëz prapë duan të luftojnë komunizmin por prapë ne do ia bëjmë të gjitha nuk ka rëndësi për kë votojnë”, deklaroi Rama në vizitën e tij.
Ndërkohë, djali i familjes që vizitoi i tregoi Kryeministrit disa piktura, për të cilat mori edhe përgëzime prej tij. “Më mirë të bësh pikturë sesa të lozësh bingo. Rrofshi të jeni mirë”, u shpreh Rama, duke inkurajuar të riun që të vijojë me pasionin e tij, pikturën.
