Athina ka marrë masa të rrepta sigurie, në pritje të vizitës së presidentit të Turqisë, Rexhep Tajip Erdogan.
Policia greke ka zhvilluar një operacion anti-terrorizëm, ku janë arrestuar deri më tani 9 persona.
Në kuadër të këtyre masave, mësohet se aksioni është realizuar nga shërbimet e antiterrorit, të cilat kanë bastisur disa apartamente në Athinë mëngjesin e kësaj të marte, duke arrestuar nëntë persona.
Këta të fundit do të merren në pyetje pasi dyshohet se kanë lidhje me një grup militant ekstremist të majtë në Turqi.
“Deri tani janë arrestuar 9 persona, janë afganë dhe kurdë bazuar në dokumentet e tyre të identitetit. Gjatë bastisjes së shtëpive të tyre policia gjeti kavanozë që përmbajnë materiale shpërthyese të paspecifikuara ende, kabllo për t’u lidhur me detonatorë dhe laptopë”, tha një zyrtar i policisë për Reuters.
Po ashtu, një tjetër zyrtar i policisë tha se autoritetet po shqyrtonin lidhje me DHKP/C, një grup i jashtëligjshëm i fajësuar me herët edhe sulme kamikazë në Turqi.
Zyrtarët e policisë greke thanë se grupi në fjalë ishte mbajtur prej kohësh në vëzhgim.
Presidenti Erdogan pritet të vizitojë Greqinë në dhjetor.
