Teksa ishte i pranishëm në inaugurimin e shkollës së muzikës “Servete Maçi” në Tiranë, kryeministri Rama ka dhënë një mesazh të fortë para nxënësve dhe mësuesve. Ai pohoi se tashmë statusi i mësuesit ka ndryshuar, ndërsa nuk përjashtoi edhe faktin se ende ka probleme për t’u adresuar.
“Meritojnë një falenderim të veçantë prindërit që nuk e pranuan një vendimmarrje të gabuar që të ndërtohej një pallat. Shkolla si një pasuri e përbashkët, në terrenin e saj i mbijetoi lakmisë dhe faktikisht ja ku jemi sot. Sot kemi një sistem mësimor më cilësor dhe miqësor me nxënësit. Mbi të gjitha kemi një trupë mësimore të mbrojtur nga sulmet e jashtme të politikës, apo nga kthetrat e politikës, apo nga imponimet e deri djeshme të korrupsionit dhe rryshfetit. Jo gjithçka është flori, pasi brenda këtij procesi ka elemente që duhet të adresohen. Ka raste që e gjitha shëmtohet nga shkelja e rregullave dhe tejkalimi i kornizës së funksionimit administrativ. Nga marrëdhënie të paligjshme mes individësh. Por nëse shohim sistemin e funksionimit të shkollës sot, kemi status tjetër të mësuesve”, tha Rama.
Kryeministri u ndal edhe tek ankesat e disa prindërve në lidhje me nismën e qeverisë për shpërndarje të librave falas, të cilët janë të përdorur. Ai tha se ruajtja e librave nuk është thjeshtë çështje materiale, por edukimi dhe dashurie.
“Ruajtja e librave dhe të tjerave që vinë pas nuk është thjesht çështje materiale. Por dhe një çështje edukimi dhe dashurie për të. Qysh të vegjël jemi mësuar se është miku më i mirë, dhe si miku më i mirë duhet trajtuar me respekt dhe kujdes maksimal. Nëse do të ishte çështje materiale, vende të zhvilluara më shumë se ne si; Suedia, Kanadaja e Gjermania, nuk do kishin këtë praktikë.
Ndaj nëse do të duhet të marrësh libra falas, duhet t’i kalosh te ai që vjen pas, të mirëmbajtur. Besoj se rezultati i këtij viti ka qenë dhe më pozitiv”, tha Rama.
Në mbyllje të fjalimit të tij, ai nuk kurseu edhe ironitë, duke shtuar: “Po ju mori malli, më keni në frigorifer në vijim, se në televizor po e po”.
