Mjafton vetëm një kollë ose një teshtitje për t’u infektuar nga virusi misterioz kinez, thonë shkencëtarët. Pohim që e bën situatën shumë alarmante dhe të frikshme. Tashmë, virusi është përhapur në të paktën 10 shtete aziatike.
17 persona kanë vdekur dhe janë 600 të infektuar, teksa ekspertë të shëndetësisë thonë se rastet mund të jenë me mijëra.
Zbulimi se virusi është ngjitës ka bërë që autoritetet të lëvizin me masa mbrojtëse. Një qytet i tretë në Kinë hyri në karantinë ndërsa zyrtarët luftojnë për të ndaluar përhapjen e koronavirusit vdekjeprurës nëpër qytetet e tjera.
Dje nëpër media kanë qarkulluar pamjet nga Wuhan, ku dallohet një qytet apokaliptik, lagje të tëra duke u dezinfektuar. Transporti është bllokuar dhe tregjet janë mbyllur. Tri vende të tjera kanë njoftuar se kanë regjistruar raste të infeksionit – Singapori, Vietnami dhe Arabia Saudite.
Organizata Botërore e Shëndetit po përballet me presion në rritje për të shpallur krizën një emergjencë të shëndetit publik, siç ka bërë për Ebola dhe Zika në të kaluarën. Shefat e shëndetësisë do të takohen përsëri më vonë sot për të dhënë një verdikt përfundimtar. Ndërkohë, Evropa është pushtuar nga paniku dhe po mundohet të marrë të gjitha masat e mundura, duke qenë se virusi vdekjeprurës ka dhe shumë të panjohura. Aeroportet janë më të kontrolluara dhe pritet që në vijim të merren dhe masa të tjera shtesë.
