Me uljen e ndjeshme të temperaturave, është shtuar edhe fluksi i fëmijëve në Pediatrinë e Vlorës. Duke iu referuar shefes së këtij shërbimi, brenda 24 orëve janë paraqitur për kontroll 70 deri në 90 fëmijë me temperaturë të lartë.
Virozat e stinës, por edhe pandemia ka shtuar fluksin e vizitave në pediatrinë e Vlorës. “Numri i vizitave në 24 orë varion deri në 70 vizita, por varet nga dita në ditë. Të dielën, numri i vizitave shkon deri në 90 vizita. Problematika është e ngjashme, me këputje, temperaturë të lartë, të vjella dhe dhimbje fyti e trupi”, tha mjekja Rina Llanaj.
Mjekja ka një këshillë ndaj nënave, që të reagojnë menjëherë kur fëmijët e tyre shfaqin shqetësime, ndërsa numrin më të madh të vizitave e zënë të vegjlit, nga 0 deri në 4 vjeç.
“Nga qyteti shifra është edhe më e lartë, pasi lidhet me shumë faktorë, nga kontaktet, ambientet e mbyllura dhe temperaturat tepër të ulëta këtë javë që shtojnë dhe më tej këto viroza”, u shpreh më tej mjekja.
