Duket se për vrasjen e biznesmenit Kastriot Reçi në Rrëshen, janë paguar shumë para. Gazetari investigativ Artan Hoxha, ka zbuluar disa detaje të frikshme teksa ka qenë i ftuar në emisionin “Abc-ja e mëngjesit”. Ai tha se vetëm snajperi që është përdorur për ekzekutimin është mbi 20 mijë euro. Lidhur me dyshimet për autorin e vrasjes, gazetari u shpreh se autori ka vepruar me saktësi kirurgjikale dhe se goditje të tilla nuk i bëjnë dot as Forcat Speciale të Policisë së Shtetit. Sipas tij, lënia e armës në vendin e ngjarjes ka ndodhur sepse arma e ekspozonte gjatë largimit.
“Mënyra e realizimit të vrasjes më tremb. Ngjarja ka ndodhur ditën në një qytet të vogël. Mënyra se si është realizuar, tregon se nuk është vrasës i rëndomtë. Është saktësi kirurgjikale, ka pasur shumë njerëz, mund të shkaktonte dëme të tjera nëse autori do të kishte zgjedhur armën tradicionale në Shqipëri, kallashnikovin. Vetëm fakti që ky lloj vrasësi është i lirë, përbën rrezik. Edhe Forcat Speciale po ta marrin përsipër atë lloj goditje, nuk e dimë nëse do ta realizojnë me përpikmëri.
Sot kemi një ekzekutor që hyn në skenën e krimit, i cili mund të ketë përdorur disa veshje edhe pse këtë nuk e dimë me saktësi. Lënia e armës në vendin e ngjarjes ka ndodhur sepse arma e ekspozonte gjatë largimit. Kostoja e një krimi është mundësia që ke për ta realizuar një vrasje, të gjesh qitës të këtij niveli ka një kosto shumë të madhe.
Nuk gjendet një snajper kaq lehtë. Viktima e Rrëshenit ruhej, lëvizjet e tij ishin të kufizuara që në momentin e ekzekutimit të vëllait të tij në Romë. Kjo ngjarje është pak a shumë si vrasjet në Tropojë, por distanca është e largët. As në Belgjikë apo Romë nuk janë kapur autorët, instancat janë të paafta deri tani për të ndëshkuar autorët. Viktima që humbi jetën në Rreshen është njeri i njohur”.
