17 persona u konfirmuan të vdekur në tragjedinë e një dite më parë të ndodhur në Misuri të Shteteve të Bashkuara të Amerikës, ku një varkë u mbyt në liqen. Por ngjarja bëhet edhe më e tmerrshme me identifikimin e viktimave, nga ku mësohet se 9 prej tyre ishin anëtarë të një familje.
Ndërsa një grua që thotë se ka humbur nëntë anëtarë të familjes së saj, është identifikuar si Tia Coleman. Ajo është një nga dy personat në familjen e saj që i ka mbijetuar incidentit të rëndë.
“Kam humbur të gjithë fëmijët e mi, kam humbur burrin, vjehrrin, vjehrrën, xhaxhain, kam humbur motrën time, nipin. Unë jam mirë nga ana shëndetësore, por kjo që ka ndodhur është me të vërtetë e tmerrshme”, tha ajo për Fox News.
“Kapiteni na tha: “Mos u shqetësoni për të veshur xhaketën e shpëtimit, nuk do të keni nevojë për të”, kështu që askush nuk i veshi, sepse dëgjuam kapitenin dhe ai na tha të qëndronim ulur”, u shpreh më tej ajo.
“Barka e rosës”, siç njihet gjerësisht ky mjet, po transportonte 31 turistë në liqenin Table Rock, në afërsi të qytezës turistike Branson, kur u përmbys. Moti i keq mbi liqen duket se kontribuoi në mbytjen e mjetit lundrues, por hetimet ende nuk kanë nisur, pasi autoritetet lokale janë përqendruar në gjetjen e 5 personave të humbur.
7 pasagjerë të tjerë të barkës u dërguan në spital me plagë serioze. Autoritetet lokale thanë se banorët e zonës ishin lajmëruar për motin e keq, por duket se barkat turistike vazhduan gjithsesi me programin e tyre. Fatkeqësisht, njëra prej tyre nuk mundi t’ia dalë.
https://youtu.be/62dAk_ILzjo?t=10
