Një ditë më parë në Itali u arrestuan tre shqiptarë si pjesë e një operacioni kundër trafikut të drogës. Atyre iu gjetën 2.4 ton kanabis, ndërsa tashmë zbardhen edhe emrat e tyre.
Shqiptarët e arrestuar janë; Bledar Danaj 21 vjeç, Erald Alidervishi 26 vjeç dhe Alfred Kamberaj 48 vjeç.
Kujtojmë se këta persona qëlluan dhe me armë në drejtim të policisë, iu ,mbeti i plagosur dhe shefi i patrullës. Kanabisi ishte transportuar nga Shqipëria në drejtim të Italisë në rrugë detare, ndërsa vijon hetimi për persona të tjerë që janë të përfshirë në trafik.
Sasi të përmasave të tilla është vështirë që të transportohen me motoskafë apo gomone, pasi për këto pesha duhen mjete lundrimi më të mëdha. Ndaj dyshimet janë se për këtë trafikim të përdoren anije, apo peshkarexha.
Ky lum droge drejt Italisë vërshon edhe pse në Shqipëri sivjet ka patur një angazhim të madh nga ana e strukturave shtetërore për të luftuar mbjelljen dhe trafikimin e kanabisit.
Kur shoferit italian iu kërkuan dokumentet pati një pështjellim, gjatë së cilës një prej individëve, i dyshuar si shtetas shqiptar, nxorri një pistoletë. Polici, falë përvojës së tij arriti t’ia bllokonte dorën keqbërësit në të cilën mbante të shtrënguar armën. Në këtë moment pati një të shtënë, ku mbeti i plagosur shefi që udhëhiqte operacionin.
Në vijim marshalli dhe pistoleta ranë në kanalin anash rrugës. Për fat të mirë, përveç një lëndimi të lehtë në njërën dorë për shkak të presionit të shtënës, polici nuk pati pasoja fizike (ju dha një prognozë prej 5 ditësh). Karabinieri tjetër qëlloi në ajër në formë paralajmërimi.
Në pamjet në video mund të shihni momentin kur polumbarët nxjerrin nga një kanal kullimi armën e përdorur nga shqiptari, e cila mund të shërbejë si provë materiale dhe mund ta rëndojë shumë pozitën e tij në gjyq, ku përveç trafikimit të lëndëve narkotike mund të përballet edhe me akuzën më të rëndë të tentativës së vrasjes për shkak të detyrës.
