Një ngjarje tragjike që i ka prekur të gjithë ishte rrëzimi i helikopterit jashtë stadiumit “King Power” të Leicester Cityt. Ky aksident i mori jetën e pronarit të klubit Vichai Srivaddhanaprabha dhe katër personave tjerë që ishin me atë.
E gjitha kjo ndodhi pas përfundimit të ndeshjes ndaj West Hamit në Ligën Premier, e cila u mbyll në barazim 1-1. Një ditë më parë u fol se një polic ishte afruar dhe me shkopin e tij kishte tentuar që të thyente njërin nga xhamat, por flakët ishin të mëdha dhe nuk ia arriti.
Helikopteri u ngrit brenda stadiumit ‘King Power’, ndërsa u përplas pak minuta më vonë në parkingun e tij (200 metra larg stadiumit) për shkak të një problemi teknik. Në pamjet e publikuara shihet një polic teksa mundohej të shpëtonte personat që ishin brenda, teksa helikopteri ishte në flakë.
Por, pasi flakët rriteshin me shpejtësi të madhe për shkak të lëndëve djegëse të helikopterit ishte e pamundur të shpëtohej ndonjëri. Në rrjete sociale, por edhe në media polici në fjalë konsiderohet hero pas këtyre përpjekjeve.
