Një tjetër aksident rrugor ka ndodhur ditën e sotme, pas atij të ndodhur në Fushë- Milot, ku u raportua se mbetën të plagosura 3 femra.
Nga të dhënat e para bëhet e ditur se aksidenti ka ndodhur në aksin rrugor Bulqizë-Shupenzë. Mësohet se një automjet tip “Citroen” me targa maqedonase SU324SB, me të cilin udhëtonin në drejtim të Tiranës katër shtetas të Maqedonisë ka dalë nga rruga në vendin e quajtur Vajkal.
Ndërsa policia e Dibrës, sipas të dhënave paraprake dyshohet bën të ditur se shkak i aksidentit ka qenë shpejtësia e madhe e lëvizjes së mjetit, çka ka bërë që shoferi të humbasë kontrollin e makinës.
Për pasojë mjeti ka dalë nga rruga në një pjesë të dëmtuar të saj, duke lënë të plagosur katër personat që ndodheshin në makinë. Dy prej të plagosurve, të cilët ndodhen në gjendje më të rëndë janë nisur drejt spitalit të Traumës në Tiranë për mjekim më të specializuar.
